احبج يا كويت من طفل من زمن الصالحين
هالمقاله كتبتها قبل جم يوم و بالضبط مع احتفال الكويت بأعيادها الوطنيه… ذاك اليوم اتصل علي واحد من الشباب و قاللي بو خلوود من زمان ما شفناك شرايك نطلع لنا مكان .. و كان ردي بالايجاب كالعاده مع هالشخص
المهم طلعنا و كان اختيارنا هالمره سوق المباركيه لانه الكويت بيتكون وقتها زحمه بالديره بسبب الاحتفالات و اليهال بيكونون تارسين الشوارع … المهم الاعلام زينت مداخل و مخارج السوق و المباني تلونت بالوان العلم الكويتي الاصيل … و بعد فتره من التمشي و شراء بعض الحاجات وتعشي ذاك الكباب الايراني الطيب و شرب تجاي السنغيل المنعنع و تجاي اللومي اللي بقبقة القوري عالفحم تسمعها من اخر السوق
قررنا نلف لفتين نهضم الاكل و نطلع لنا مكان ثاني ... المهم طاحت عيني على محل كنافه و من زمان عنها قررنا كل واحد ياخذ قطعه و قعدنا بره المحل نتحلى فيها ... المهم و احنا قاعدين الا اثنين يهال وقفوا على الطاوله الا يقولون .. عمي ممكن نقعد ؟؟ قلت اكيد .. الا يقول عمي ترى انا ولد الحجيه ؟؟؟؟ قلت شكو ؟؟ لووول .. الا طلع ابوهم معلمهم انه سوق المباركيه ما يدخله الا ولد الحجيه .. شغل الدعايه مالت التلفزيون.. عبالهم اللي ما يقولها ممنوع يدش
كان فيه صحن على الطاوله فيه كنافه منغثر فيها من اللي كان قاعد قبلنا ... المهم الياهل لف علينا و قال عمي منو مسوي جيذيه هذا مو حرام ؟؟ ما يصير نخلي الاكل جيذيه بدون ما نخلصه او نقطه بالزباله
الا التفت و اطالع صاحبي ... و قلتله هذا الياهل مو بزمانا ... هالياهل اما انه من زمان الصالحين او من عالم ثاني
ماشالله على الاخلاق .. الا التفت و اطل بالمحل و اشوف ابو الياهل ومن اعجابي باليهال الاثنين قمت و رحت داخل المحل اسوي نفسي اشتري ماي
الا الف على الريال و يمكن تعتبر لقافه ... و اقوله هاليهال اللي قاعدين بره عيالك ؟؟ قاللي ايه عسى ما ضايقوكم .. قلت تبي الصج ؟؟ ايه ضايقوني باحراجهم لنا بحسن تربيتك ... و الف نعم فيهم و بمن رباهم ... مشالله عليه الحب ما يطلع الا على بذره ... استحى وايد و كان ودي والله اعطيه بوسه على الراس من شدة الاعجاب بتربيته
تربيته كان عباره ادب الجلوس .. الحديث ... و التدليل
ما شاء الله عليهم الله يخليهم له
المهم بعد ما خلصنا طلعنا و قلنا نروح البحر و نمر على الخليج شوي تغيير جو على الرغم انه قلنا يمكن يكون زحمه بس قلنا دام الوقت قارب على نص الليل يمكن ما يكون زحمه .. بس كان الوضع ماله داعي تبون الصج الشارع كله فوووم و وصاخه و مدري شنو ... و الناس ترش عليك حتى لو توك مغسل سيارتك و حتى لو كنت مو بمكان مسيرات ووناسه .. مسكيين صاحبي كان توه غاسل السياره و ما يبيها تتوصخ و الناس و لا عالبال
المهم رحنا البحر وقفنا و نزلنا الا كل واحد فارش الارض و حاط اغراضه .. اللي يشوي يمين و اللي يلعب كره يسار .. و يتمشى على البحر و اللي منسدح عند اهله ... بس كل هذا بصوب و المنظر الاخر بصوب
قوم في مكان عام قاعدين وين ؟؟ قاعدين على جبل من الوصاخه و القاذورات و الاوراق و النفايه
ايه فمكان يعتبر من اجمل الاماكن بالكويت عالبحر خلوه الناس مكان للقذاره و الوصاخه و متى ؟؟
بأهم يومين بالسنه .. يومين العيد الوطني و عيد التحرير على قولتهم الشهر الوطني
يا حسافه على بعض هذا الشعب اللي معتبر هاليوم يوم مفتوح لترفيهه و ليش لترفيه وطنه ... بدل لا يكون هاليوم لتنظيف البلد و ابراز حبهم له ... كل واحد مسوي لي انا وطني و احب الكويت و لافلي راسه بعلم او راسم لي على خده علم الكويت و الفوم في ايده و بعد ما يخلص منه تلقاه حذف القوطي بالشارع او صكه في سياره قاعد تمشي
والله عيب
المشكله و انا امشي على البحر منو شفنا ؟؟ شفت الياهل اللي كان بالمباركيه مع ابوه قاعدين عالبحر ووالله وقتها قلت والله حرام الأبو يايب عياله اهنيه عشان يعور قلوبهم من المنظر اللي بيشوفونه اهنيه من وصاخه و عدم اهتمام بالنظافه و اللي كنا مستحين انا و رفيجي شلون نرد على هالياهل من اخلاقه و منطقه
انا ما اقول الا يا ليت اللي يدعون الوطنيه انهم ينسون هالمسمى ... لانه الوطنيه و الوطن اسمى و اكبر من انه يكون اسم ينقال على السنتهم