أييييه .... التفاحه الكبيره غير
قبل خمس سنين اول ما ييت امريكا كان بعض الشباب يحنون علي خلنا نروح حق التفاحه الكبيره تعال معانا نيويورك ... و لكني كنت ارفض لأن كان براسي فكره اني بخلي نيويورك أخر منطقه ازورها بأمركا بعد تخرجي .. و هذا اللي صار بعد التخرج و تخليص اوراقي من الجامعه و التخلص من اغراضي بالبيت و حجز تذكرتي للكويت عالكويتيه اللي بتطلع من نيويورك للكويت مباشرة ... قررت اوقف بنيويورك لثلاث أيام
السفره صارت بسرعه بسرعه و الحجز قبلها يوم و الفندق قبل الرحله بساعتين ... هذه الرحله من اسرع الرحلات بحياتي من حيث الترتيب ... اذكر ذاك اليوم ما نمت ... واصلت لأن رحلتي كانت ساعه ثمان الصبح و الباص بيمرني ساعه 4 الفجر ... لول ... كانت الحاله صعبه شوي
بعد معاناة من ايجاد فندق ... الكل مفول لدرجه انه بعضهم فول لمدة اسبوعين جدام .. و الاسعار حدث و لا حرج
كنت متوقع الفندق ب 100 او 150 ان كثر طلع الضعف للليله .... كوني دورت مكان قريب بقلب نييويورك مانهاتان
لاني قررت اروح بروحي و ما حبيت اسكن بعيد و اتوهق بذيك الديره اللي ما تنام
طرت الصبح ووصلت الظهر و اذكر اني انصدمت من مكار جي اف كي لانه كان وصخ عزكم الله و الاشكال اللي فيه غلط ... خذيت جناطي و طلعت ... جنطتين كل وحده اكبر من الثانيه لانه ردة المتخرجين غير .. كل اغراض الغربه و الكتب فيهم ... لول .. طلعت من الباب الرئيسي الا اشوف التكاسي تكلف 45 دولار لفندقي ... الا اييني ذاك الهندي بالليموزين و يقولي اركب ؟؟؟؟ قلتله خير يوبا تعرفني قالي اركب اوصلك ب 60 دولار ... قلتله تماسي ارخص ب 15 دولار فرق عنك ... لما شافني بمشي عنه قالي اركب اركب كأنه يطبق مقولة العوض و لا القطيعه ووصلني بسعر التاكسي
طول الرحله للفندق كنت اشوف المدينه تبين من بعيد و كأنها ثلاث داون تاونز في مدينه وحده .. صج نيويورك اللي نسمع و شنوفها بالافلام ... هذه نيويورك اللي يجيها الملايين من كل انحاء العالم ... خمس سنين بأمريكا راحت بلاش جدام 3 ايام بيويورك ... يوم شفت نيويورك حسيت اني بأمريكا
مثل عنوان موضوعي ... نيويورك غيييير .. مدينة تمثال الحريه صج غير.... ديرة اكبر مدينه صينيه غير.. و
المدينه اللي ما تنام وصبحها مثل ليلها صج غير ... ناسها غير ... مبانيها غير ... بنيويورك ما تقول شنو اسوي اليوم .... لانه كل ما تمشي تشوف شي بيشدك ... الله يخلف علينا يوم كنا ببولدر ... تمر علينا أيام عشان نلقالنا مكان نستانس فيه
لول
السياح من كل ديار العالم ... النظام مثل الساعه ... رغم انه ما تقدر تحط ريلك بالشارع من كثر الزحمه و لكن يا سبحان الله الكل عارف طريجه ... سياران الاسعاف و الشرطه ما تمر عليك دقيقه الا سامع صوتها و ماره يمك
المذيعين بالشوارع و افلام تتصور بكل زاويه ... بصراحه حبيتها و تحسفت اني ما ييتها من قبل
عيوبها .... غااااااااااااااااليه .... نار و شرار .... من كل شي .. أي شي بمدينتك ضربه بأثنين ... مادري شلون الناس متأقلمه بالحياة هناك ... ولكن بشكل عام ما اظن فيها عيوب غير انها حياة مدينه ما راح تضوف فيها ارض خلاء
كل ما تلف راسك بتلقى مبنى بويهك ... اذا رفعت راسك ما تشوف السماء من علو ابراجها .. فاذا ما تحب الزحمه بعد عنها و لا تفكر تسكنها ...
اماكن انصح بزيارتها و تجربتها
لا تطلع عنها دون ما تزور تايمز سكوير
لا تطلع عنها دون ما تصعد برج الامباير ستيت
لا تمشي عنها دون ما تركب باص مانهاتن و بروكلن
لا تفكر ترد ديرتك قبل لا تزور تمثال الحريه
ما يبيله اوصيك على زيارة حديقة السينترال بارك
لا تنسى تصور مع الديناصورات في متحف الطبيعه الامريكي
و اكيد الأكل غير في اليمن السعيد
ثلاث ايام مو كافيه عشان تاكل التفاحه يبيلها اسبوع علاأقل عشان تخلصها
تجربه جدا حلوه و اذا فكرت ارجع امريكا زياره فبرجع عشانج يا التفاحه