يقولون مالا يفعلون
لن ننسى ما فعلتموه …. لن ننسى ما دمرتوه …. لن ننسى من قتلتموه
الحكومه تفكر باسقاط الديون و التعويضات عنهم ,,, و تسندهم بملايين الدولارات كقروض
تناااااااااااااااااااااقض
شي بصراحه محيرني …. اليوم الثاني من اغسطس و عشان ما نقط نغزات … اليوم هو يوم يصادف يوم الغزو اللي صار من تقريبا عشرييييييييييييييييييييين سنه عالكويت … يعني صارله عقدين من الزمن …. زمن جيلين كاملين ما مروا فيه … يعني اختي الصغيره اقول لها غزو تقولي ايييه مو هذا اللي دشوا العراقيين فيه على الكويت … تقول دشوا و ما تدري شالسالفه … يعني بس خلاص ليش ناوين تزرعون هالفكره براس الاجيال القادمه ؟؟ ليش .. شنو الهدف
أولا صار لي كم يوم و التلفزيون و الجرايد اذبوحونا لن ننسى و لن ننسى … انا عاد توني راد من امريكا و خمس سنين غربه عبالي لن ننساك يا بو مبارك و الا لن ننساك يا الأمير الوالد … بعدها طلع لن ننساك يا الغزو ؟؟ شفيه ابو الغزو … اللي يقول نص الكويت اقعدت ايام الغزو … مو الواقع يقول انه ثلاث ارباع الكويت نحشه ويقول وين طريقك يا الخفجي
نبدي التحليل … شنو المغزي من شعارات لن ننسى … اذا هي ايضاح الوطنيه فمشوا بوزكم … اعتقد الوطنيه مفهوم مستحيل نلقها بالكويت … الوطنيه كلمه أسمى من انها تكون بينا او في بيوت الكويت الا ما قل و ندر عشان الظليمه لان الظليمه شينه …. كل واحد ذابحنا هالسنتين و يطلع لي بالشارع و يقولي الكويت و الكويت و لما يخلص التجمع و ركب سيارته تلقاه اما متجاوز السرعه او قاطع اشاره … او قاط له وصاخه بالشارع و الا مخالف القانون بأي طريقه … و بالنهايه تلقاه يقولك كويت و كويت … الثاني يصارخلك بكلمة ترشيد و هو هوز الزرع ناسيه من ثلاث ايام و الا ليتات البيت شابه ليل و نهار … و الثالث يقولك مال عام و هو يطالب باسقاط قروض الناس و اكبر بايق له و مستغل اراضيه لمشروعاته عالبحر … أنا مو ذابحيني الا بكلمة وطنيه … اللي يعرفون نطقها دون معناها
نرجع لموضوع لن ننسى … نقول لن ننسى اذا الغزو صار له سنتين او ثلاث سنين … بس لمدة عشرين سنه فلا و الف لا … صدام راح و مات و هو سبب الغزو و عياله هم راحو وياه … يعني بكلمة لن ننسى الحين ما نقصد صدام نقصد الشعب العراقي كله بزينه و شينه ؟؟؟ لن ننسى شنو ؟؟ لن ننسى انكم غزيتونا ؟؟ انزين يقولونلك مو احنا هذا صدام .؟؟ تقولهم لأ انتو ؟؟ يعني تيون العداوه تستمر بينا و بينهم و احنا ناوين نحسنها و نردها مع ردة سفيرنا لهم بعد غياب ثمان عشر سنه القطاعه الدبلوماسيه ؟؟
والله لو استمرينا بجيذيه اعتقد العراقيين بيسوون يوم و يسمونه لن ننسى حقدكم يا كويتيين … حاقدين علينا كل هالسنين .. والله و ما راح الومهم … بدال لا نفتح صفحه يديده و نشوف عيوبنا اللي مو راضيه تخلص قاعدين نستمر بفتح جروح اندملت .. والله عيب … و المشكله اليديده انه ربعنا عارفين عيوبهم و راضين فيها مثل واحد يمشي بالشارع و يقول هاهاها ايه احنا الكويتيين حجايه يعني يعني نتكلم وايد و قيل و قال يعني انت اذا عارف نفسك عيل اسكت و لا تنقد العالم و اصلح عمرك …
انا ما اقول الا بدال لا نكون حاقدين لهالدرجه و نستمر نزرع هالافكار بروس عيالنا نوقف شوي و نحاول نركز على امور ثانيه ما يدرون انه بكلامهم هذا يعورون قلب ام شهيد او قلب زوجة اسير او قلب طفل ابوه مفقود .. يعني والله عيب خلاص
ادري موضوع مو بذيك الأهميه و لكن ديرتنا و الناس اهنيه سووله اهمية اكثر من اللازم لو الذكرى للغزو مهمه جان شفت كل العالم يحتفل بأيام الغزو بديارها بكل هالسنين اشوف فرنسا و و بولندا و هولندا و ايطاليا و المانيا ما يحتفلون بأيام الغزو الالماني عليهم ؟؟ يعني هم اقل منا ؟؟ لا و لكن يدرون انه بهالشي راح يؤججون مشاعر الشعب و يخلون الكره اللي اندفن بداخلهم يكبر و يعود و تصير عداوات من يديد و هذا اللي بيزعزع ديارهم و مستقبلهم …
ما أقول الا حسافه عليج يا كويت … عيب والله عيب
و للحديث بقية عن الوطنية المزعومه من البعض