|
|
غربه بالمكسيك مو بأمريكاقبل كم شهر كتبت عن موقف صار لي مع أحد الهنود بالسكن اللي أنا ساكن فيه بعنوان " هندي بأمريكا " و الموضوع بعد قراءته شدني أني اكتب عن تجربتي مع فئة ثانيه و هي ثاني اكبر فئه من حيث العدد بأمريكا بعد الأمريكان ألا و هم المكسيكان أو كما يسمون " بو مكسك " , لحسن الحظ خلال دراستي بسانت لويس لم يمر علي احد منهم ابدا , ما كانوا موجودين بسانت لويس أبد يمكن لانهم ما يواطنون الخوال هناك , الله العالم , و المعروف عن المكسيكان انهم يتواجدون بكثرة في الجنوب و بالغرب لأنها اقرب للمكسيك و زين للنحشات و الدخلات و زيارة اهلهم
في 2005 كانت تجربتي الأولى لزيارتي لدنفر عندما رأيت أول مكسيكي وجها لوجه و من الفرحة صورت معاه ,,,, لا ما صورت معاه .. لول .. الي يقول شايف السديس أو أل الشيخ
و بعد هالزياره و سبحان الله بدت تتوالى رؤيتي لهم , ففي 2006 و خلال اجازة الربيع رحت فلوريدا ( اورلاندو و ميامي و ملبورن ) و خلال وجودي بميامي زرنا احد المولات الا انشوف الكل يخزني أنا و صاحبي العماني مادري ليش .. مادري شايفين مخلوقات فضائيه و الا دناصورات ؟؟ بعد لفتين بالمول لفيت على بوجاسم و قلتله : مو ملاحظ شي غلط ؟ قالي ايه واللله , حاس انه شي غلط صاير حولنا , وقفنا بمكانا عشان نستوعب الخلل و بعد نظره سريعه من حولنا ... قلت حق بو جاسم : احنا بأمريكا و الا بالمكسيك ؟؟ كل اللي حولنا كانو مكسيكان و السبب انهم كانوا يخزونا أننا كنا نتكلم لغة غير المكسيكي و هم عبالهم احنا بو مكسك . أذكر حتى انا دخلنا محل نتسوق الا أيينا راعي المحل و يعني بوجبنا قال حياكم الله اقدر اساعدكم ؟؟ بس بالاسباني ؟؟ التفت عليه و عطيته نظرة الاستغراب قلتله طال عمرك ما نتكلم مكسيكي احنا عربوا عربوا , رد و كمل سوالف معانا بالمكسيكي و لا هامه .. لفيت على صاحبي و قلتله اقوله عربوا يقولي مكسيكوا ... شنو الحاله وياه ... المكسيكان مثل بو عراب اذا ركب راسه و لا مليون شيطان يخليه يغير رايه
و بعد خمسة اشهر حولت الى منطقة بولدر بكولورادو ... اللي فيها نسبة لا يستهان بها من المكسيكان ... اول مواقفي وياهم هي في ماكدونادز اذكر واقف انا والشباب بالسياره ننطر عشان نطلب" درايف ثرو" و كما هو معروف أن يوم الجمعه و السبت يكون زحمه عمطاعم الفاست فود غالبية الناس توها راده بيوتها من الطلعه و تحب تاخذ اكلها عاد انطر لين يجي دورك و تطلب ... المهم بعد الطلب و المعاناة لين ما فهم صاحبنا المكسيكي الطلب .. رحت بدفع الا يطلع كل الطلب غلط ... أنا تنرفزت و قلتله الحين أنا ناطر نص ساعه عشان اطلب و بعدين كل شي غلط ؟؟ قالي هذا اللي صار .. قلت أمنا بالله اخذ الطلب الحين ... قال لا يا اخوي روح و صف مره ثانيه بالطابور و اطلب من يديد ... قلت و لا بعرس امك اسويها .. خذ الطلب الحين و لا عادي اتصل على الاداره و افصلك و المعروف بماكدونادز ان ادارتهم تحترم الزبون اكثر من أي شي .. بس الغريبه انه رد علي رد ما توقعته بعد ما قلتله عادي افصلك قالي افصلني... قلتله من صجك؟؟ قلت خير انشالله ... و اول ما رديت البيت اتصلت على ادراة المطعم و قدمت الشكوى و بعدها تعدل الشخص و صار ريال ... هذه مشكلتهم المكسيكان ركبة الراس ... ما عمري صار لي موقف مع امريكان بيض او سود و يراديدون الزبون بس بو مكسك عبالهم قاعدين للحين بالمكسيك.
قبل اسبوعين و أنا رايح النادي اتدرب صار لي موقف حتى بالكويت ما يصير ... وقفت بموقف تقريبا عند الباب النادي .. و بعد التدريب طلعت و ركبت سيارتي احرها و لأنه كان ثلج قعدت بالسياره لين يذوب الثلج اللي عالدريشه ... الساعه 2 الفجر ... ما احس الا الشخص اللي الشاحنه اللي بالموقف الجدامي يشب العالي علي قلت يمكن الريال ناسيه .. و بعدين اشوفه يكبس قلت شفيه هذا ين ؟؟ و المشكله انه برد سحتني بره و مالي خلق انزله بليل يمكن سكران او شي و الساعه متأخره .. اشوفه نزل .. قلت هذا وقت السلاح ... يوم كنت بسانت لويس و لانها اخطر مناطق امريكا كنا نتسلح غالبا بسكاكين بسياييرنا فقط للحمايه , ما تدري شنو يصير هناك ... و اذكر الشباب كانوا عندهم مسيل للدموع و واحد قنبله يدويه ؟؟ لووول لا عاد هذه زياده مني ... فأنا دوم حاط سجيني بالسده يمي تليتها من السده و طق علي الجامه الشخص الا يطلع بو مكسك اطول مني مرتين و اعرض خمس مرات أنا اول شي عبالي فيل الماموث المنقرض رجع من يديد مع هالثلج ... نزلت الجامه و قلت خير يبه ... قالي ما صارت متى بتمشي؟؟ ... عاد انا اكره شي عندي واحد يسألني هالسؤال .. قلتله و ليش تسأل مضايقك .. قال بوقف مكانك ... المشكله انه واقف جدامي يعني ما فرقوا الموقفين و المواقف كلها فاضيه ساعه 2 بليل منو بيجي يعني. قلتله ماني ماشي الحين ... قالي هذا موقفي .. قلت ايه هذا وقتك يالراشد يا حبك يوم تحاجج أحد بالقانون .. قلتله فيه لوحه تقول أنه الموقف لك ؟؟ قال لأ و لكن كل الناس تعرف اني اشتغل اهنيه و دوم اوقف بهالموقف... قلت دام مو مسجل لك الموقف عيل مالك حق تمشيني ... المهم قعد يهدد و يتوعد اذا ييت المره اليايه ... مادري شنو بيسوي فقمت اضحك اهنيه شب و صار احمر و راح طفا سيارته بموقفها و دخل النادي ... المهم من اليوم الثاني رحت قدمت شكوى عليه و ما شفته بعدها ... ما بقى الا اننا ندفع فلوس عشان ندرب و ننهان .. لول ... ادري ان قطع الارقاب و لا قطع الارزاق بس مع هالاشكال اظن أن قطع الارزاق و الارقاب حلال فيهم
المواقف ما تخلص مع بو مكسك لدرجه اني قمت اتجنبهم لاني ادري انه بيصير شي اذا وايهتهم ... تبون الصراحه انا ما قمت اطيق المكسيكان أبد و هم يمكن من أسوأ التجارب اللي مرت علي بأمريكا ... المشكله انهم مساكين و فئه فقيره ... و لكن عبالهم رفعة الخشم هي اللي بتعزهم ... و المشكله الثانيه انهم للحين عبالهم انهم بالمكسيك مو بأمريكا بلد القانون ... اللي احترمه...
محمد الراشد
الأول من يناير 2008 |
|