سعادة الخبير
من زمان ما كتبت ... بس مادري حاس انه ودي اكتب شي ...الحمدلله الوضع مستقر حاليا بعد شهرين من الدوام ... الحمدلله دوام كمدقق حسابات باحدى الشركات ...مدقق الحسابات شغله حلوه وايد ما توقعتها جيذيه .طول عمري الدراسي في البزنس سكول ما كنت ابي اشتغل بمجال المحاسبه كل تفكيري بقسم الاستثمار و التمويل , مادري ليش على الرغم اني خريج دبل ميجر محاسبه و تمويل ,مو لأنه انا حاب التمويل بس مادري فكرة المحاسب بالكويت اللي كانت براسي انه محاسب ورا مكتب و جدامه مليون الف ورقه و حاسبه و يحسب و بس ... مدري ليش كله كان ايي على بالي مشهد مسلسل دارت الأيام يوم راح مشاري البلام يتعلم بشركة ابوه محمد المنصور و حطوه بقسم المحاسبه ..المشهد و المكان اللي كان فيه يضيق الخلق و كل ما اتذكر المحسابة كانت تييني ذيك الصوره و يضيق خلقي. لووول تفكيري تفكير غريب ساعات.
المهم بعد فتره من البحث عن وظيفه وخاصه بالوضع الاقتصادي السيء بالكويت و العالم واحد من الشباب ما قصر و نصحني اني اروح المكان اللي انا فيه و الله سهل الامور من يومها و انقبلت بسهوله , الوظيفه هي عمل ميزانيات الشركات و تدقيق حساباتها اما لكونها شرط على الشركات المدرجه انه تدقم ميزانياتها للبنك المركزي و البورصه او لكون الميزانية مهمه لمعرفة وضع الشركه او المحل ماليا .
العمل كمدقق بصراحه هيبه .. لك احترامك و قوتك عند العميل .. يعني تروح تامر و تنهي لأنك بمركز القوه و خاصه لما العميل او الشركه اللي قاعد تدقق عليها فيها بعض الاخطاء او التجاوزات و تبيك تضبطهم .. مدري ليش و الحمدلله قلبي ارتاح للشغله على انها مو مشهوره ابدا بالكويت و قليل الكويتيين فيها , لدرجه انه احنا ما نتجاوز عشر كويتيين بالمكان ما بين اكثر من 200 اجنبي, العمل مرهق و طويل اكثر من 10 ساعات يوميا و ست ايام بالاسبوع لكن له متعته و طعمه . يكفي انك تتعلم كل يوم مليون شغله . التدقيق مو مثل المحاسبه العاديه . التدقيق يغطي كل اجزاء المحاسبه لانك لما تسوي ميزانية تسوي كل اقسامها و لكن اذا اشتغلت محاسب عادي راح بس تغطي الجزء او القسم اللي انت متوظف فيه و هذا ما راح يعطيك الفرصه انك تنتقل مكان ثاني او قسم اخر لانك لازم تتعلم من يديد
ميزات العمل كمحاسب . ما راح اتكلم عن الميزه الماليه لانه جدا سيئه . على الرغم انه قطاع خاص و لكن للأسف التقدير المادي مفقود ( ملحوظه فقط للعلم : الراتب ما يوصل ال 1000 كويتي) , و لكن هناك مليون ميزه او اقدر اسميها ركيزه بالوظيفه . اولا التعلم , هالوظيفه راح تعلمك المحاسبه على اصولها و تغطيلك اياها من كل جوانبها. ثانيا : الضغط حلو مو لانه يولد الانفجار و لكن لانه راح يعلمك شي انه الوقت له قيمه و انك لازم تستغل كل دقيقه عشان تنجز و تخلص شغلك قبل موعده و الشي الاهم بالوقت و هو اللي قاله لي بو عمر قبل لا اتوظف انك بعد ما تغير عملك مدقق بعد عدد من السنوات راح يخف عليك الضغط و راح هالشي يدفعك انك تدور عمل خاص او مشروع عشان تشغل وقتك بعد الدوام الفعلي . ثالثا , التدقيق هو وظيفة العلاقات يعني كل يوم عند عميل مو اقصد كل يوم كل يوم و لكن كل جم اسبوع تكون عند شركه يديده و تقابل ناس يديده يعني انا خلال شهرين رحت 6 شركات و تعرفت على اداراتهم الماليه و موظفينهم و سويت علاقه طيبه لابقاء , فتخيل وضعك بعد سنه او سنتين . رابعا : مدري اذا هي ميزه او لا و لكن انك تبدي صغير ماديا و مركزيا شي حلو , مدري قاعد اقول لو اقبلوني النفط هل راح يكون وضعي جيذيه ؟؟ راح على طول يكون معاشي قوي و منصب حكومي فما راح يكون فيه فرحه كبيره بالترقيه او بزيادة الراتب او أي شي ثاني كونك بديت بمكان عالي من البدايه و لكن لما تبدي بشي صغير او انا برأيي اعتبره اصغر شي من ناحية الراتب و المنصب لخريج جامعي مثلي فالصعود حلو ... مثل صعود الدرج خطوه خطوه راح يكون لها طعم بعد فتره . خامسا و هو الاهم الخبره كما هو معروف و المتداول بين خبراء البزنس فان خبره اللي راح اخذها من العمل كمدقق تعادل 3 سنوات عن عمل في أي شركه اخرى و تعادل 5 سنوات عمل في الحكومه . يعني كل سنه كمدقق كأني مشتغل 5 سنين بحكومه . و هذه هي خطتي اني اشتغل سنتين او ثلاث لين ما اخلص انشالله دراسة الماجستير ب2011 و بعدها باذن الله اغير مكاني براتب قوي و منصب احلى . سادسا عملك كمدقق الترقيات فيه سريعه كون اللي يستمرون بالمهنه ما يطولون يعني كل واحد يقعد سنه او ثنتين و يطلع فهذا معناه انه هناك ترقيات سريعه و مثل ما تعرف لما تحول وظيفه ثانيه ما يقل منصبك عن المسمى الوظيفي اللي طلعت منه بشركتك الاولى فعليك الحساب .
علعموم وظيفه مرهقه و لكن بنفس الوقت ممتعه و لها لذه ,الله يوفق الجميع و تقدرون تسموني الحين " الخبير" على قولة بو نوره.
ادري الموضوع ما يحكي قضية معينه كما تعودت بمقالاتي السابقه و لكن التواصل مع الناس لو عن طريق خاطره او مقاله شخصيه شي احسن من لا شي و شكرا
والله من وراء القصد