الله يخارجنا
من فتره كنت ادقق بكتب احد البنوك الرائده بالكويت و خلال فتره تدقيقي تعرفت على مجموعه من الشباب اللي يشتغلون هناك كوني اقضي اسابيع قد تصل الى اشهر بالتدقيق على البنك فكونا علاقه صداقه طيبه مع خيرة الشباب هناك اللي نتمنى تصير زماله يالقريب.
كنت اقول كلمه بنقاشاتنا معاهم الا و هي " الله يخارجنا " و كانوا ماسكينها علي كونهم مو عارفين معناها و اليوم مقالتي الشهريه " اقصد اللي صارت ربع سنويه " بسم " الله يخارجنا" من اللي صاير.
صار لي حول السنه من وقفت اهتمامي الفعلي بالسياسه لكون العمل ياخذ وايد من وقت الانسان اللي يعتبر العمل اساس لحياته. لكن صار لي جم شهر بديت ارجع اقرا عن الوضع الراهن و ما يحتاي اقول انه اللي ما يهتم بالسياسه غصبا عليه يبدي يهتم الحين لانه السياسه بدت تدش و تأثر على وضع كل رب اسره و قامت تأثر باستقرارنا بهالديره و تأثر على حرياتنا.
وضعنا بالديره والله يخرع و زاد من حدته . انا من زمان عندي نفس النظره التشاؤميه اتجاه الوضع بالديره من ايام دراستي بأمريكا و اهتمامي بأمور السياسه و النقد اللاذع اللي لابد منه بوجود اشكال ما يسوى نضيع وقتنا بالكلام عنهم و ابرازهم لانهم برأيي اصغر من الحشرات اللي تنشاف.
ايام رمضان كنت اسمع بكارتون بو قتاده و بو نبيل تعظيم لدور بورميه بالبلد ... و الثاني يرفع العقال لمسلم لتهديده لوزير الداخليه ان وصل للمجلس انتقاما من احداث الفرعيات .... و الثالث يدق على نغم الصباح بالمارينا من 7 و نص الصبح عشان يمجد افعال الرياضيين طلال و اخوه احمد اخو ضاري لين ما قطع المذيع الاتصال غصب.
و بعدها بجم يوم اقرا الجرايد على مانشيت اسمه 4 استجوابات من يزيد ؟؟
خلال سنتين او 3 سنين صار عندنا بالكويت عشرات الاستجوابات اللي ما صارت من قبل. و صار حل لمجلس الامه 3 مرات بثلاث سنين و الرابع ياي بالطريج.
الغريب بالموضوع مو الاستجوابات نفسها ... الغريب حق منو الاستجوابات .... الاستجوابات الأربعه حق أل الصباح ... حق الاسره الحاكمه ... الله و أكبر الحين صار الضرب بالعالي ياللي ما تستحون .... انا اول مره اشوف واحد يضرب رموز ديرته ... وين الاخلاص ... وين الولاء ... وين الوفاء .... انا ما اقول الا مالت على الباميه ....
وزير الدفاع ... وزير الداخليه ... و رئيس مجلس الوزراء ... على المنصه ... بس ما اسميها منصة استجواب الا منصة اعدام ... انا مو قاهرني الا البراك نفس الاستجواب لنفس الوزير باقل من 6 اشهر ... شنو هالمصخره
مادري ليش احس اعضاءنا يقولون داخلهم التالي : ولهنا على دوس الروس .... ولهنا على القمع .... ولهنا على التحقيق و الضرب ... من الأخر ولهنا على الحل غير الدستوري ....
وانا أقول : الله يخارجنا و يستر من اللي بيصير