اطلاق نار ... عمار يا اتحاد عمار
ماشاالله عليهم اتحادنا الكويتي للطلبه بأمريكا . كل ما صار اطلاق نار بمنطقه ارفعوا تلفوناتهم و تطمنوا على اخوانهم بالمناطق اللي صار فيها اطلاق نار.
صج واحد يحس انه مو بروحه بالغربه ... صدق من قال " اتحادنا بيتنا بغربتنا "
اتحادنا يذكرني بمشهد حامي الديار اللي بالقهوه يوم يقول سعد الفرج انه دوم يروح الديوانيه اللي عروقها بالماي .. تعرف المخفي و تكشف المستور ... و هذا مثل اتحادنا ماشالله عليهم الشباب ... لجنه خاصه للتطمن على الطلبه و احوالهم على كل صغيره و كبيره ... قبل يومين كان فيه اطلاق نار بنبارسكا و ما قصروا الشباب و اتصلو .. و امس رمي بدنفر و لكن كل شي بخير ...
خلنا نوقف مع اخطر مناطق امريكا اول شي ؟؟؟ عشان نحلل الوضع اللي صاير ... و نعرف مقدار خطورتها على طلبتنا : يقولك مصيبة ميتشيغان ,, اذا فتحت حساب بالبنك يعطونك شوزن هدية
Most Dangerous U.S. Cities, 2007
1. St. Louis, Mo.
2. Detroit, Mich.
3. Flint, Mich.
4. Compton, Calif.
5. Camden, N.J.
6. Birmingham, Ala.
7. Cleveland, Ohio
8. Oakland, Calif.
9. Youngstown, Ohio
10. Gary, Ind.
NOTE: Cities with 75,000+ population. The rankings are based on a city's rate for six crime categories: murder, rape, robbery, aggravated assault, burglary, and motor vehicle theft.
Source: Morgan Quitno Corporation. Web: www.morganquitno.com .
انزين الحين يبدى التحليل العقلي و بالارقام ... حسب الاحصاءات الرسميه لمركز الجرائم و التحقيقات في امريكا نلاحظ التالي ... ان سانت لويس , ميزوري ... اللي عشت فيها 3 سنين من عمري دراسيا تعتبر رقم واحد من حيث الخطوره بالقتل و السرقات ... حيث اذكر انه سيارتي امباقت مرتين خلال 3 اشهر ...
تسمع الرمي كل ليله و جنه قاعدين ببغداد ... اذكر مره من المرات ساعه 12 بليل كنا متجمعين بشقه واحد من الشاب بالويكند سوالف و ضحك .. و السكن مسور و كل شي تمام ... نتفاجأ احد يطق الباب .. احنا العاده لما واحد ايي من الشباب يدز الباب و يدش ما يحتاي يطق الباب ... فعرفنا انه شخص غريب .. قام راعي البيت عشان يشوف اللي عند الباب ... اخونا فتح الباب الا يشوف ذاك الخال اللي طوله عشرين متر و جسمه يمشي على زنده التيس و دار الحوار التالي بينهم :
صاحبنا : hey
الخال : wazup bra
صاحبنا : nothing much , can I help you
الخال : I am cool man … you cool ?
صاحبنا : I am cool … what do you want ?
الخال : man… you wanna be cool?
صاحبنا : ??
الخال : its cheap bra … buy some
طلع خالنا يبيع هيرويين و ومخدرات و يبينا نصير كوول مثله ... راعي البيت كان من الامارات تضايق حده لاننا مو راعين هالمصخره و اطرده و راح ياب سجين المطبخ مالت الذبايح ؟؟
قلنا الريال عزم يدخل السجن ... ؟؟
بعد ما طرد الخال راح و كان في كرتون عند الباب مال الشقه ... غج السجين بالكرتون و قال اذا فيه خير يرجع مره ثانيه " والله لأشق بطنه " , بدافع الدفاع عن النفس.
اللي بقوله انه سانت لويس مرت علينا سوالف ما يعلمها الا الله ...
اذكر بأحد الايام كنا قاعدين جدام الشقه و نشوي ... الا يمر علينا ذاك الخال و يعرض علينا سيديات افلام و اغاني ..
سعر السيدي الاصلي 20 دولار و اخونا يبيعهم على 3 دولارات ... طلع صاحبنا يبوق و يبيع ... و جنه العيد
مره بعد مرينا مكان فيه محلات ... و احنا نمشي تفاجأنا بلوحه على المحل تقول 100 دولار و نازل ... تفاجأنا لانه المعروض بره جاكيتات و جواتي عزكم الله ماركات و شي و سعرها الاصلي ما يقل عن خمس اضعاف السعر المعروض .. على الرغم انه المحلات الموجوده مالت خوال و ما توحي انها حق ناس هاي
دشينا المحل الا نسأل شالسالفه مالت الاسعار ... و بعد نقاش و تحايل الخال قالنا الصج ... قال يا
طويلين العمر " البضاعه كلها مبيوقه و احنا نبيعها برخيص عشان نمشيها بسرعه " ... قلنا بأنفسنا لهالدرجه صارت الحرمنه عيني عينك ... قلنا لا يحوشك ما بقى الا نشتري اغراض حرام ... الغريب بالوضع انه الخال كملها و قال " اذا شفتوا أي شي بمحل ثاني و عجبكم ... او عاجبتكم رنقات سيارات او أي شي فتراني حاضر .. ترانا بييبها برخيص"
فهمنا انه الريال بيدز ربعه يبوقونها و يرد يبيعها علينا برخيص ... طلع صاحبنا مع غسيل اموال ..
المهم اللي انا بختصره و راح ألخصه انه سانت لويس صج اخطر و اغرب مدن امريكا و انا مستانس انه كانت لي خبره هناك لانني شفت و سمعت اشياء ما عمري سمعتها او شفتها ... مخدرات توصيل منازل ... رمي عيني عينك ... اغراض مبيوقه بمحلات رسميه ... و اشياء ثانيه وايده لو اقولها يشيب لها الراس؟؟؟
نرجع لموضوع اطلاقات النار و الاتحاد ... تصدقون انه طول تواجدي بهذيك المنطقه ما تم الاتصال و لا الاطمءنان علي و لو مره وحده ... رغم كل اللي ذكرته
مو المقصد انه زعلان انه ليش ما اتصلوا ... هاهاهاها
و لكن القصد ليش هناك عدم وضوح اعلامي ... دعايات اعلاميه يوم يحتاجونها لابراز اهتمامهم بالطلبه من هالناحيه ... و الشي الثاني اللي مستغربه ... اطلاق النار كل يوم في كل منطقه يعني مستحيل يمر يوم على منطقه دون ما يصير فيها جريمه او قتل ... فالتساؤل ليش الاهتمام ببعض المناطق من دون بعض ... او لجنة الطواريء لتفتل عضلاتها ؟
آلية عمل جديده الله يستر منها قادمه بقوه ... الله يخارجنا
ملاحظة :
1- مسمى خال هو فقط لابراز الشخصيه و ليس عنصريه ... لانه الخوال هم من اكثر الناس اللي احبهم و احترمهم .
2- اتحادنا اعماله واضحه و جليله و لكن النقد قد يكون لصالحهم في كثير من الاوقات خاصة بالوضوح الاعلامي اللي مفقود عندهم .. و هذا ذكرته قبل سنه في مقالة نبيها خمسه.
محمد الراشد
ديسمبر 2007