موقف في المنطقه العاشره
المكان ستاربكس الكوت
الزمان : 6 و نص بعد صلاة المغرب
الحاله : مزريه كوني قاعد ادرس لامتحان نهائي
تعال تعال انت نظف اهنيه , انت تعال جيب هذا كرسي حطه , روح روح جيب جريده ... بابا شنو جريده ... جيب جيب جريدة الراي... بس بس خلاص روح رجع جريده ما يبي.
هذا موقف خلاني اوقف دراستي للامتحان عشان اكتب هالموقف اللي صار جدامي و خلاني ارجع لكتاباتي .
موقف يضحك صراحه من مواطن من سكان المنطقه العاشره اللي يقول اللي يشتغلون بالمكان خدام عند اهله مو يقول انهم موظفين بالهمكان مثل ما اهوا موظف بمكان ثاني.
اللي يشوف هالموقف يقول النظافه و التزقرت و ريحه الطيب طالعه من الريال راعي الموقف مو يقول العكس ... بس الصج انه العكس
مادري لين متى بعض الناس عبالهم انه يملك الناس و انهم عبيد عنده ... انا اعتقد و هالكلمه ارددها وايد ... انه لو كل واحد يعرف حقوقه على الناس و حقوق الناس عليه وقتها والله ما راح تصير لا مشاكل و لا عوار راس و لا تأخير بالاعمال و لا بالالتزامات ... على سبيل المثال في الدوام لو كل موظف يعرف حقوقه و شنو مطلوب منه جان ما نشوف تعطيل و بيروقراطيه و تأخير و كل واحد ناطر الثاني يشرح له شنو مسؤولياته و شنو اعماله اليوميه.
اذكر دكتورة الاداره عندنا بالجامعه بيوم من الايام سألت منو من اللي قاعدين بالكلاس يعرف شنو بيسوي بدوامه لهذا اللاسبوع طلع نص الكلاس مو عارفين على الرغم انه بعضهم مدراء و مهندسين و كبار المناصب بوظايفهم كون انه الاوامر توصل لهم فجائيه و توصل الاوامر بعمل شي بوقته يعنب ماكو شرح لمسؤوليات هالاسبوع مما يسبب تأخير بالتعلم و الانجاز.
هالشي وايد مرجعنا ورا صراحه بالكويت للأسف لازم توعيه اكثر لللشعب. ممكن اسميها نوعا ما تربيه مو توعيه لانه اللي عندنا بعضهم يبيلهم تربيه كون التوعيه تكون للناس المتربيه على شي و يبيلهم زياده بالتوجيه. لكن فيه ناس مو متربيه اصلا مثل صاحبنا ببداية الموضوع .
انشالله يطبق هالشي بالمستقبل لانه سبب رئيسي بتطور البلد.
معلومه : تصدقون منطقة كيرلا الهنديه الفقيره فيها اربع مطارات دوليه و داخليه و احنا بالكويت الله يخلف علينا عندنا مطار واحد وكل يوم محترقه بوابه فيه. ( لا تقولي عدد سكانهم اكثر هو السبب )
ملاحظه : المقال مو عنصريه ضد سكان المنطقه العاشره و يكفي اني احد سكانها و لكنه موقف و حبيت اشارككم فيه