كبسه
أمس رديت البيت في وقت متأخر بعد جلسه مطوله مع الشباب تبادلنا فيها اطراف الحديث في مواضيع مختلفه , و أنا راجع البيت لاحظت انه عدد كبير من دوريات الشرطه و النجده بمنطقتي " بولدر " متجهين الى شرق المنطقه و بشكل كبير لم اعهده ابدا .؟؟ فأعتقدت انها كبسه من كبسات وزير الداخليه على الفرعيات اللي صايره هاليومين بالديره .. وفجأه تذكرت اني بأمريكا … علعموم موضوع اليوم عن الحمله اللي مسويها وزير الداخليه الله يطول بعمره على موضوع الفرعيات الانتخابيه ؟؟؟
تدرون انه امريكا فيها فرعيات ؟؟ و لكنها بأماكن عامه و الكل يشوفها .. هذا مثل اللي يسويه مرشحين الحزب الديموقراطي بين اوباما و هيلاري .. هي مو 100% فرعيه و لكن تنتهج نفس التوجه كونهم يشوفون الديموقراطيين منو يبون فكل الديموقراطيين وقتها يرشحون واحد من الأثنين الديموقراطيين على مواجهة المرشح الليرالي على الرئاسه . و بالكويت نفس الشي القبيله ترشح واحد او اثنين عشان ما تتشتت الأصوات يوم الانتخابات و وقتها كل القبيله تصوت حق هالاشخاص اللي تم اختيارهم بالاجماع.
ماكو اثنين يختلفون على سلبيات الفرعيات و انها تحرم بعض المرشحين من نزاهة الفوز و الترشيح بالانتخابات كونها في غالبية الوقت ستحدد الفائز قبل موعد الانتخابات نفسها . المريب بالموضوع انه القانون موجود من عقود على منع الفرعيات و لكن من دون تطبيق كامل . مادري شنو طاري على وزارة الداخليه هالسنه و شاده حيلها بالمنع . هو خل يشوفون الدوائر شلون متوزعه بعدين خل يتكلمون … و الا بذمتكم دائره فيها 100 الف ناخب و الدائره الثانيه فيها 30 الف ناخب .. هذا عدل يعني ؟؟
خلنا نتطرق للحلول اللي صايره من ناحية وزارة الداخليه الموقره , صار لي يومين و أنا اتابع هالموضوع بالنت و تلفزيون الوطن جزاه الله خير مصور لنا كل تحركات الداخليه مع المخالفين . امس شفت فيديوالدكتور سعد الشريع و شلون القوات الخاصه لاعنين ابو خير بيته مكسرين كل شي و بيت راعي الفحماء نفس الشي ( ترى راعي الفحماء مرشحنا بالمنطقه العاشره ) علعموم والله لما شفت البيت قلت اما انهم كابسين على بيته انهم شاكين انه تاجر مخدرات او عنده مصنع خمور و لكن الموضوع انها كبسة فرعيه … المشكله انه ما كان احد بالبيت لا فرعيه و لا هم يحزنون . و الفيديو الثاني وضح كيف كان التناقش بين غانم الميع و قائد القوات الخاصه على فض التجمع اللي صاير ببيته عشان الفرعيه . الميع معترف و قال انه بنفضها بس انسحبوا و لكن صار ما لا يحمد عقباه لما صار طق بين القوات الخاصه و مجموعه من المتجمهرين خارج البيت و تم استخدام قنابل المسيله للدموع و الهراوات لتفريق المتجميع . و الله حسيت اننا بقطاع غزه او بالمحله الكبرى في مصر و كيف صار طق و هواش بين المصريين و القوات الخاصه هناك . انت لما تشوف وضع القوات الخاصه متجمعه كأنه هناك انقلاب بيصير او حرب .
صج الوضع مؤسف , الوضع ذكرني بأيام الارهاب اللي صارت في 2006 و كيف الوزاره كانت تحاربهم . خلنا نرجع لقلب الموضوع . أنا ضد الفرعيات و لكن ما تنحل بهالطريقه … الكويت عباره عن مجموعه من القبائل و القبائل كما هو معروف بدو في غالبيتهم و البدوي او الانسان بطبعه ما تعجبه دوسة الراس … كرامته فوق كل اعتبار و هذا هو الصحيح , فتخيل انك ببيتك متجمع مع مجموعه من الاصدقاء و تييك مجموعه اخرى و تتجمع عند بيتك و تطالبك تفض التجمع, حتى لو انت مسوى غلط بتعصب و بتتنرفز و بتفزع و تتهاوش مع المتيمعين عند بيتك . وضع القوات الخاصه و الشرطه بسياراتهم و هاراواتهم صج غلط و أنا اللي مستغربه اكثر انه كيف هالقوات كأفراد رضوا يروحون و يتعدون على المواطنين الموضوع ما يستاهل كل هالشي .
واحد من الشباب الحكماء قال حل , قال ليش الأمير ما يتجمع (مثل ما يسوي الملك عبدالله و فهد من قبله
بالسعوديه) مع شيوخ القبائل بالكويت و يفهمهم انه اللي يصير غلط و اننا ما نبي فرعيات و شوي شوي يفهم الشعب و يتركها , مو بيوم و ليله يجمعون قوات الخاصه و يهاجمون البيوت . حتى بيوتنا ما صار لها حرمه أبد
و الأدهى و الأمر انه كثير من الناس يدرون ليش الوزاره ضاده حيلها هاليومين و قاعده تشيل الدواوين و هجوم على الفرعيات و الكثير المرير عشان تلهي المواطنين على امور قاعد تصير من الوزارات بسبب غياب الرقابه من مجلس الأمه بعد حله و هذا اللي مخلي الشعب يلتهي حاليا بهالأمور و غايبه عن باله كبائر الفضايح من قوانين قاعد يتم تشريع من الوزراء دون المرور بالمجلس لاقرارها؟؟
انزين انا الحين متبع نهج اسمه انظر لكل موضوع من الناحيه الايجابيه و لو كان الموضوع سلبي … فموضوع الفرعيات سلبي و لكن خلنا نشوف ايجابياته . مو من حق كل مجموعه من الناس انه شخص يمثلهم , يعني العنوز على سبيل المثال مو من حقهم يرشحون عنزي يمثلهم و يهتم بأمورهم ؟؟ و اذا لأ ليش لأ ؟ ؟ هذا سؤال ابيكم تفكرون فيه و قولولي اذا هو غلط او صواب ؟؟
و للحديث بقية
محمد الراشد
ابريل 2008