معايير الاختيار
كل انسان يمر بمراحل مصيريه من حياته بدءا باختيار مجال الدراسه , او العمل , او شريكة العمر او اشياء ثانيه .... و لاني خلصت من مرحلة اختيار مجال الدراسه و مررت بمرحلة مصيريه اخرى الا و هي اختيار مجال العمل . صراحه القرار هذا مصيري و يمكن يكون بقوه اختيار مجال الدراسه لانه على اثره راح تحدد مجال راح تستمر فيه و تاكل منه و يكون معيلك الاول . تختلف معايير الاختيار من شخص لاخر و سبب كتابتي هالمقاله اليوم هو لاني مريت و لا ازال امر صراحه بهالمرحله و حبيت انقل افكاري كالمعتاد للناس و القاريء كي يستفيد.
الكل عارف و كوننا مسلمين انه الانسان مسير و مو مخير حسب اعتقادي . كل شي مكتوب بلوح مفحوظ و كله توفيق من الله . انا بديت كمدقق للحسابات و كانت الشغله بتوفيق من الله و بمحض الصدفه و بمساعدة واحد من الربع و الحمد لله كانت تجربه ناجحه بكل المقاييس ما عدا الجانب المالي. خبره و احتكاك و معارف و عمل تحت الضغط العالي اللي بغالب الاحيان يكون اعلى من ضغط محول الكهرباء اللي عند بيتنا. و لظروف خاصه قررت تغيير وظيفتي و الحمدلله انقبلت باكثر من مكان و برواتب مختلفه و بمجالات مختلفه اكثر . التقييم بين الوظائف شي صعب وايد و القرار يكون اصعب و اصعب مع مرور الوقت مو لشي معين و لكن لانك لازم تقرر و ترفض شي ما جربته . يعني لو المكان اللي يقبلك يعطيك الفرصه انك ترجعله بعد ما ترفض عرضه يكون وايد احسن لكن الواقع يقول العكس . المكان اللي ترفض عرضه صعب يعرض عليك الوظيفه مره ثانيه.
بحالتي انا قبلت عرض احد شركات القطاع النفطي الخاص. المشكله انه القطاع يحكرك بزاوبه قد تعيقك عن التحرك او الانتقال باماكن اخرى كون خبرتك فقط بالحسابات النفطيه. صحيح انه مسمى الشركه قوي و لكن هل هالشي راح يشفعلك على المستوى البعيد غير الانتقال لشركات نفط ثانيه؟
السؤال هو ما هي المعايير اللي على اساسها تقرر هل هالمكان او هالعرض هو المناسب لي ؟ معاييري كانت كالتالي الراتب و الممزات الماليه كون الراتب هو اساس معيشتك , ثانيا الخبره و المسمى الوظيفي لانه هالشي راح يساعدك في حالة تبي تنتقل لعمل اخر, و ثالثا بعد مكان العمل عن البيت و هذا الشي البعض ممكن بعتبره ماله داعي يكون بالمقارنه و لكن بالكويت هذا الشي من الاساسيات , لما تكون كل يوم بالشارع لمدة ساعه عشان توصل دوامك من الزحمه وقتها راح تعرف انه هالشي مهم. و و بعد من المعايير ادارة الشركه و منو مديرك بس للاسف هالشي ما تقدر تحدده الا لما تداوم يعني ما راح تقدر تقرر قبل لا تقبل العرضو تجرب مديرك حتى لو الناس مجربينه من قبل و قالولك عنه و لكل التجربه الشخصيه مع المدير تكون افضل من سماع خبرة الغير.
انا مادري ليش احس انه الخبره اللي تكسبها من العمل هي الاساس بالاختيار و لكن البعض يعتقد انه المميزات الماليه هي الاهم. برأيي شنو فايدة فلوس و انت مدير بس مو فاهم شي . و لكن بنفس الشي شنو فايدة كونك مدير فاهم بس راتبك و لا شي مقارنه بالاماكن الثانيه . بصراحه شي حيرني وايد و للاسف للحين ادور بهالحلقه المفرغه بتحديد مكان عملي .
حبيت بس اشارككم الافكار.
ملاحظه : واحد قال لي كلمه اعجبتني " انسى تلقى مكان كامل و فيه كل معايير الامتياز"