نبيها خمسه
السلام عليكم و رحمة الله و بركاته
نبيها خمسه ...نبيها خمسه ...نبيها خمسه..... عبارات رددها الشارع الكويتي او عشان ما اظلم المعارضين لنبيها خمسه اقول "عباره نبيها خمسه عباره رددتها فئه من المجتمع الكويتي". ؟
انا مو كاتب المقاله عشان اتطرق لموضوع الدوائر لكن شدني شي اضحكني و ابكاني في نفس الوقت. خلال تصفحي لاحدى المواقع الطلابيه في امريكا المؤيده لنبيها خمسه كان هناك قسم يجري لقاء مع الطلاب يسألهم عن رايهم بالموضوع هل موافق او معارض و لماذا؟
النقطه ان القسم الاول من السؤال مقدور عليه لكن العله بالقسم الثاني اللي يقول لماذا ..... انا ما راح اتكلم عن معدين اللقاءات و لكن بتكلم عن التفكير السطحي للشارع الكويتي ( البعض و ليس الكل) و كل المشاركين كانت اجابتهم موافقين لكن السبب لموافقتهم تدرون شنو .... واحد يقول الطائفيه بدون لا يحدد شيقصد و الثاني يقول عدد الاصوات ... مادري بعد شيقصد .... و الادهى و الامر لما ما يعرفون شنو يجاوبون يقولون عشان ننهي الفساد .... كل اللي تم لقاءهم يقولون عشان نمنع الفساد
انا اللي موتني من الضحك في واحد منهم نسى يقول الفساد ..تدرون شنو سوى المذيع قعد يغششه بصوت واطي.....الا يقول ايييه الفشاد الفسااد ؟؟
والله حرام و الله عيب يعني انت اذا مالك خص بالسياسه ليش تبدي رايك و تسوي نفسك ابو العريف
و العتب على المعدين اللقاء اللي يايبين النطيحه و المترديه عشان يسألونهم
والله الواحد مايدري يضحك و الا يبكي على الفساد اللي على قولتهم ما راح ينتهي. اذا الناس اللي تبي تقضي علفساد قاعد تفسد نفسها . انا اتكلم علبرنامج الطلابي . يبونها خمسه لانهاء الفساد و اهم قاعد يسيطرون عالطلبه بطريقتهم . هذا مو فساد فكري يعني ؟
من المشاكل باللقاء ايضا ان الكل كان مع الخمس دوائر .. يا سبحان الله الكل يبيها خمسه يعني ما كان في معارضين من طلاب امريكا ... وين الوضوح الاعلامي
علعموم انا مع الخمس لكن ما عجبني التشويه الاعلامي الطلابي و الفكر البدائي لبعض طلاب امريكا.... هذول لازم يكونون النخبه و لكن للاسف بعضهم صار الندبه
كان الله في عون من لاعون له
والله من وراء القصد
محمد الراشد
10th of MAy 2006