يا اجمل الاوطان ما ينطفي نورك
عالي يا صوت الوطن .. عالي كما صوتنا
و مهما يجور الزمن ... نعشق هوى بيتنا
و بيتنا الكويت ... احنا له الأسوار
ودربنا الكويت ... درب بناه الأحرار
بمناسبة الانتخابات مؤخرا في الكويت نسمع تصريحات و نقرا مقالات لناس كثيره مرشحه او ناخبه و الجو بالكويت صج انه متوتر و طاخ و طيخ بين الحكومه و المرشحين او بين المرشحين نفسهم و لكن يبقى انشالله هالشي دايم بديرتنا على الاقل صوت الديموقراطيه يكون عالي .
و أنا راد من دوامي شغلت الرادو على احد المحطات الا اسمع هالاغنيه و شدتني و اججت فيني روح الوطنيه المزروعه فيني و بغيري من سنين ... و خلتني ارجع بذاركتي بمواقف حصلت لي ارتبطت بالكويت و حب الناس لها .
صحيح انه كثير من الناس قاعد يأزمون و يزرعون الفرقه و الخلاف بين السلطتين و من جم سنه ما شفنا أي تطور بالبلد لتركيز المأزمين على اشياء هامشيه ما لها داعي و البيروقراطيه بأتخاذ القرار وايد ساعدت على تأخير التعمير.
هذا الشي خلى وايد من الناس يطالبون بحل المجلس حتى انهم كرهوا الديره و الوضع فيها و فكروا يطلعون منها و يستقرون بمكان ثاني ... و انا كنت نفس الشي والله عندي هالتفكير و هالشي يذكرني بموقف حصل لي بأيام امريكا .. اذكر في أخر الايام لي بأمريكا تعرفت على دكتور و صار واحد من الشباب ماشالله دكتور كويتي و الف نعم و خريج ايرلندا و بعمري ... كان يتكلم على الوضع بالكويت و شلون ماكو تشجيع للدكاتره و جيذيه فوجهت له سؤال شلون التقدير المادي عندنا للدكاتره و قاللي انه لا يقارن بالخارج و لا يوصل حتى النص ... ضحكت حزتها و قلتله انت مينون ؟؟ لو انا مكانك ما قعدت يوم بالديره و رحت المكان اللي يقدرني بالخارج
طالعني بنظرة احترام و ابتسم و قاللي كلمه هزتني و كل ما اذكرها تدمع عيني بيني و بين نفسي
قاللي
" محمد ... هذي الكويت "
جمله من كلمتين تحمل مليون معنى بين ثناياها ... صج هذه الكويت ... ما تربينا بديره عشان نتركها ... ممكن ننتقل مكان لفتره نشتغل و نكسب خبره بس ما نهاجرها. صح لسانك يا بو سلمان
و قبل جم يوم قاعد اسمع ندوة على الراشد الا يقول شي مقارب لهالشي ... قال كثير من ابناء الدائره الشباب يوووه و قالوله احنا خلاص قررنا و بنهاجر لأننا ملينا من الوضع المتردي و المن المؤزمين و من عوار الراس
قال لهم كلمه وااايد حلوه ... قال مو احنا اللي نطلع هذه الكويت ديرتنا تربينا و عشنا فيها ... و المؤزمين و الدخلاء علينا هم اللي لازم يطلعون منها و ما لهم مكان بينا
تبون الصج ؟؟ كل كلمه من كلامه حكمه ... احنا اللي نحب ديرتنا نطلع منها و الناس اللي قاعد تأخر تطويرها عشان يطيحون قروض عن ربعهم او عشان ياكلون املاك الدوله قاعدين فيها ... لا والله ما لهم مكان
يعني هالاشكال من متى بالكويت ... ما وصلوا الكويت و تركزوا فيها الا من بعد التحرير تركزوا فيها و رجعوا من سعوديه تلقى كل واحد بدرج مكتبه جواز ازرق و ثاني اخضر ... و آخرتها يطالب بأشياء و كأنه ولي علينا.
بأحد البرامج على قناة سكوب ضحكني ... كان الموضوع عى الفرعيات و هو كان معاها لانه قبلي ... الا يدق واحد ضد الفرعيات و قال هذه قتل لحقوق الاقليه الا يقول المذيع لا ياخوي هذه ديموقراطيه و الاكثريه تقول كلمتها .. قصده انه أي اكثريه لازم توصل و تسوي اللي تبيه ... بذمتكم هذا منطق ؟؟ يعني الحين ولاية امور الناس صارت للي عددهم اكثر ... و الا للي عقولهم اكبر ؟؟
الا بيني و بين نفسي اقول الله يستر علينا اذا هالاشكال موجوده بالديره عادي هالاكثريه تفكر بالوصول لاكثر من كرسي مجلس الامه او مجلس الوزراء ... وقتها لا تقولون لي زمن صدام بيرجع وقتها زمن مئات الصدامين راح يطلع
انا ما اقول الا عسى الله يحفظ الكويت و المخلصين فيها و ما تطيح بيد هالاشكال و عالي يا صوت الوطن... و يا اجمل الأوطان ما ينطفي نورك
قبل يوم من الانتخابات الكويتيه لعضوية مجلس الامه
خمسه عشر من مايو 2009