للأسف .... بوخالد طلع مو وطني
"تصدقين انا ودي اشتغل بره الكويت" .... انا اقول
"من صجك , انا ماقدر" وحده من الاهل ترد
"شدعوه انتي ما ودك تشتغلين بره الكويت شويه مع زوجك , تكسبون خبره و حياة يديده فتره معينه" ... انا اسألها
"بعد فترة سكوووت .... محمد صراحه اقولها لك بس مستحيه" قريبتي ترد علي.
"قوللي لا تستحين ما فيها شي ... شنو بتقولين" ... انا اجاوبها
"محمد.... انت طلعت مو وطني" .... سكوت بدون رد لهول الصدمه.
هالسالفه ردتني جم سنه ورا لنفس الموقف بيوم من الايام كنت اسولف مع واحد من الشباب عن وضع الكويت و شلون التسيب و الفساد و المحسوبيه و عدم التخطيط منتشر بالكويت ... و من كثر ما تعمقنا بالموضوع قاللي محمد انت صراحه مو وطني ... كأنك بنقدك مو كويتي ....
هالكلمات وااااااايد اثرت علي و خلتني انظر و ابحث شنو هي المواطنه و الوطنيه بمنظور الناس عندنا .
الوطنيه مثل ما اشوفها بعيون الناس و افعالهم هي ان تتغنى بحب الوطن كثر ما تقدرو تكثر من كلمة انا كويتي انا و يوم تصير ابسط ازمه انت اول من يلقي اللوم على الاخرين و يتهرب من المسؤوليه ... الوطنيه عندنا انك تدعي انك انت و اهلك هم من بنوا هالبلد و انك و باجي المواطنين ايد وحده و لكن بوقت الصجيه تكون انت ماده اولى و غيرك ماده ثانيه و انت كويتي اصيل و الثاني كويتي مزدوج ...الوطنيه مثل ما فهمتها من شعبنا هي انك تنهب كثر ما تقدر من هالديره لانها مو دايمه و تتعدى على القوانين على كيفك و اللي ما تقدر تسويه بره الكويت تقدر تسويه بالديره لانها ضافتك و فيه امه خير اللي يوقف ضدك تدري ليش كلها عشان تثبت وطنيتك للاخرين ... الوطنيه عندنا انك توقف بوجه كل وزير و تأخر التنميه و البناء بدواعي خوفك على المال العام ... الوطنيه عندنا انك تطلب اسقاط القروض لانه الشعب اولى ... الوطنيه هي انك تطلع بالشوارع و تسوي مظاهرات و تعتبر الشارع هو متنفسك السياسي بره قبة البرلمان ... الوطنيه هي ان تاخذ حقك بيدك و تقول انا اقدر اسكر شوارع منطقتي على قوات الامن ... من الوطنيه انك تقول لو أءشر بصبعي مليون من قبيلتي يملون الشوارع مظاهرات... من الوطنيه انه تتبارك و تقدس اللي يعتبرون الله حزبهم وقتلوا اهل ديرتك بيوم من الايام... الوطنيه هي انه تشوف رجال الشرطه كل واحد ماسك لي تلفون و قاعد بسيارته يهذر او يضبط له بنت بداعي التفاني بالعمل ... الوطنيه هي ان المناقصات بالخش و الدس و لعمك خشمك .... هذه هي وطنية من يدعون الوطنيه.
انا اقول مو الوطنيه هي شعارات او هتافات او حتى شهادات او قعده او شغل بالديره ... الوطنيه ان تعمل شي لرفع مستوى ديرتك قبل ان تكون لرفع مستواك ... الوطنيه ان تنتقد او تنصح بهدف الاصلاح مو بهدف الافساد .... الوطنيه هو ان تمثل شعبك ووطنك بالخارج افضل تمثيل ... كيف ترقى الامم من دون موجه واعي و نقد لاذع حتى يصحى النائمين من سباتهم ... شلون تبونا نرتقي و احنا على طمام المرحوم من سنين و عمك اصمخ.
هذا يخاف بصارخ على هذا فالثاني يزعل ... و هذا خايف يفصل هذا لتسيبه بالعمل فالثالث يزعل ... اذا بنجامل هذا و ذاك على حساب المصلحه العامه فأنا اقول هنيالكم وقتها بالوطنيه اللي تبونها .
و يا فلانه ترى الوطنيه مو معيارها الشغل او القعده بالديره ... و كل من يخدم ديرته من مكانه و حسب نيته.