|
|
الغربه و ما ادراك ما الغربه
الكل له القدره على التحمل و الصبر .. و لكن صبر الغربه غير
اذكر اول ما قررت اني اسير بطريق الغربه .. مر على تفكيري سؤال .. هل الغربه وناسه ام تعاسه .. هل هي بداية البناء و التعمير او بداية الشقاء و التدمير .. هل كلها تفاؤل ام تشاؤم ؟؟
اول ما وصلت امريكا .. سانت لويس .. بعد معاناة الثانويه و التوفل و القبول الجامعي و الفيزا على ذيك الايام اللي تحط ايدك على قلبك الين ما تطلع الفيزا وصلنا امريكا شيكا بيكا على قولة بو امام .
وصلت سانت لويس ساعه 12 بليل مع اخوي الكبير .. اول المواقف استقبلنا خال من خوال الجامعه .. انا ما ادري الجامعه ما لقت غير هالخال يستقبل الطلبه يعني ؟؟ و النعم فيه بس احس انهم كان هدفهم ابراز معالم سانت لويس من البداية بخوالها
وصلنا الفندق .. اللي عجبني ان الجامعه لها فندق و هذا يذكر لها بصراحه فندق قوي و تابع تماما للجامعه و هذا مدح مو ذم بالجامعه ,, بعد الصلاة و النوم .. قمنا الصبح الا نشوف الارض متروسه ثلج و هذه اول مره بحياتي اشوف الثلج بعدها وصلنا مكتب الطالب الاجنبي بالجامعه و سألناهم عن طلبه كويتيين قالوا ماكو .. لكن فيه عرب .. قالوا احنا نتواصل معاهم ثم نعطيكم خبر
بعد العوده للفندق ما هي الا ساغات معدوده الا نشوف عيال قطر و الامارت يحلون علينا بالفندق و يقومون فينا قومه انا و اخوي .. ماشالله شي ما كنت اتوقعه موجود باهل الخليج لعدم احتكاكي فيهم بالسابق ما عدا السعوديين و لكن بصراحه هذه هي أساس تثبيتي بالغربه و من يومها حيست اني مو بغربه بتاتا.
ناس استضافوني عندهم لشهرين كاملين حتى حصلت على سكن و من بعدها سكنت مع احد اطيب اهل الامارات و صار زميلي بالسكن و هذا ايضا خلاني ارتاح اكثر ,, و تجارب كثيره لا تنسى لدرجه ان احد القطريين كان بصراحه بحسبة الأب بالغربه و كنت اسميه يبا
نصايحي ال 11 للطلبه بالغربه :
الالتزام بالعادات و التقاليد و القيم الاسلاميه هي اساس الشخص و هي السر اللي بيثبته و بريح باله
حاول تمثل بلدك و دينك احسن تمثيل مع مراعاة الا تبالغ بحبك او ابرازك هذا الحب بشكل مبالغ فيه لانه راح ينفهم من الشخص الثاني بشكل عكسي. و حاول تشيل من راسك فكره اننا شعب الله المختار
مخالطة العرب و الخليجيين و الجنسيات الاخرى .. كنت اتبع قاعده تقول اجعل لك اخ في كل بلد في العالم و لحسن حظي عندي اخوه في اكثر من 80 % من الوطن العربي و الاسلامي.
السكن مع زميل في اول عام دراسي .. لا انصح بالسكن وحيدا بأول عام و لطلبة اللغه السكن مع العائله الاجتهاد من اول فصل على رفع المعدل لان التاريخ يقول ان المعدل يقل مع مرور الزمن فاذا كان معدلك عالي من البداية ماكو خوف على نزوله بالأخر لانه ما راح يؤثر وايد
الاستفاده من تجمعات الشباب و انا من ناحيتي انصح بمجالسة من هم اكبر منك سنا .. لا انصح بمجالسة الصغار لان الصغير ما راح تكتسب منه غير مضيعة الوقت على عكس كبار السن (طلبة اخر سنه او طلبة الدراسات العليا ) لانهم صندوق ملئ بالخبره و المعرفه
عدم العوده المتكرره للبلد .. ضبط رجعتك كل كريسماس و ما انصح برجعة الصيف .. استغلها باخذ مواد صيفيه بدل الرده و لا تبالغ و تقعد اكثر من سنه بالغربه لان والدينك لهم عليك حق و لا تقطع عنهم باتصالك اكثر من 10 ايام .
استغلال الغربه بكل مفيد .. اكتشف البلد اللي انت فيها .. انا شنو سويت كنت حاط شغله براسي .. ما اترك امريكا الا زاير كل منطقه فيها .. و ما احب ازور المنطقه اكثر من مره الا اذا كانت لاسباب اجتماعيه
انصح الطلبه اذا كان عندهم وقت بالانخراط بالعمل الطلابي من عمل قروبات او انديه او المشاركه بالاتحادات الطلابيه بالجامعه او خارجه لما فيه فايده و معرفه و خبره و تمثيل لدينك ووطنك
.
العمل منذ البدايه على ابقاء الطموح عالي على سبيل المثال التفكير باكمال الدراسات العليا او العمل لفتره بالغربه لاكتساب الخبره العمليه بعد التخرج.
بعد التخرج حاول تبقي التواصل مستمر مع اصدقاءك القربين حول العالم حتى لا تضيع كل صداقاتك اللي بنيتها بالغربه خلال الاربع سنوات من خلال انقطاعك عنهم اشهر قليله .
تمنى ان خبرتي فادتكم و لنا مقاله ثانيه بالمستقبل القريب و هي تلبيه لنصيحه واحد عزيز على ان اكتب عن نوعيه الشباب المغترب و عن حياتهم الغربويه و لنا لقاء ما هو ببعيد.
محمد الراشد
اغسطس 2007
نوعية الشباب بأمريكا
حسب ما قلنا بالمقال السابق انه راح نتكلم "عن" و ليس "على" الشباب المتغرب بأمريكا .. لأن " عن " تختلف اختلاف كلي عن "على" ... اللي عاش بالغربه يلاحظ نوعيات مختلفه للشباب العربي بالغربه و نقول الكويتي بشكل أخص .
شوف اللي تشوفه متين و تارس مخابيه صلبوخ يعني هذا دريس , و اللي تلقاه عصل و دومه يلبس جوتي اسود هذا ابعد عنه ينخاف منه ؟؟؟
هاهاها لا يكون صدقتوا , بصراحه هناك تقريبا ست الى سبع انواع من الشباب "حسب رأيي" و نبدي فيها من الاعلى الى الأقل :
اولا : الشاب الخلوق الدريس المتفوق المحافظ على عاداته و دينه هذه النوعيه نادره , من الصعب تلقاه, هالنوعيه تحصلها من البيت للجامعه و مع الشباب بالويكند للترفيه المحدود.
ثانيا : الشاب الخلوق لكن قعدات الشباب الزايده هي اللي مخربه على دراسته , هالنوعيه انا اسميها على الله لانه كل ما تسأله عن دراسته يقولك الله يسهلها و الا يقولك مستوره . هذيله وايد و تحصلهم كل مكان مثل النمل و الحمد لله .
ثالثا : الشاب اللي حاط براسه ( انا بغربه و ما ابي اشوف عربي ) , هذول والله عددهم مو قليل , و تحصلهم يختارون مناطق غالبا ما يكون فيها كويتيين لكن لسوء حظهم يطيحون بمناطق تعج بالخليجيين فيتوهقون لان الخليجي يسحرك بأخلاقه فغصبا عنك تخاويه.
رايعا : شباب صايعين وقت الصياعه و دريسه وقت الدراسه , هالنوعيه انا اسميها الشباب الذكي اللي يلعبها صح, هذه مثل الامريكان دراسه وقت الأسبوع و صياعه بالويكند لكن دام امورهم ماشيه ما عندهم مشكله
خامسا : الشاب اللي حاط براسه خلاص انا وصلت امريكا ما اطلع منها , يعني بمعني اصح عشق هالديره , غالبا يكون ماشي بدراسته و متفوق و لكن تلقاه يطول بعض الشي عشان يقعد بأمريكا و يحاول بعد التخرج يكمل شغل اهنيه و ياخذ القرين كارد عشان يستقر.
السادس : هالنوعيه تضحكني بعض الشي وهي قليله و لكن بارزه , لأنهم مساكين هذه نوعية المطاوعه اللي يدرسون بأمريكا , تلقاه حالته حاله , لا ياكل مثل الناس كله حرام مو ذبح اسلامي , ما يطلع مكان كله عورات ما يشوفها , ما يقدر يتحمل دون زواج , شوي يقولك المسيحيه من اهل الكتاب و يبي يتزوج و لما تقوله فوقه يقولك لا بس المسلمه احسن , تييله مسلمه وقولك هاه لا الكويتيه احسن , تقوله كاهي الكويتيه تزوج و ييبها وياك يقول هاه لا مسكينه ما يبيها تتغرب معاه , ما عرفنا لهم المطاوعه ؟؟
السابع : هذه النوعيه الله يكون بعونها , طلبة البعثات اللي تلقاه داش تخصص ما يدري شنو اهوا بس كونه بعثه و القانون يقول ماكو تغيير تخصص , تلقاه يكرف يكرف و هو مو عارف السالفه و لا عارف كوعه من بوعه و بالاخر تلقاه اما راجع الديره او مغير تخصصه على حسابه .
و هناك باقي كم نوع بس اللله يستر علينا و عليهم ... عاد شوف الحين انت أي واحد منهم و قلبها براسك يمدحون النوع الرابع .. هاهاها
محمد الراشد
اغسطس 2007
اذبحونا بالبيانات
بيان العيد الوطني , بيان التحرير , بيان انسحاب , بيان الغزو . ما بقى الا ينزلون بيان زواج ؟؟
ياحبهم للبيانات ربعنا , اللي يسمعهم او يقرا بياناتهم يقول ما بقى الا جم شهر و يحررون الاقصى . ما يدرون انه ببياناتهم هذه يمشون على النهج اللي هم رافضينه بالأساس الا و هو بيانات الاستنكار و الشجب اللي حكوماتنا فالحين فيها .
صار لي جم يوم ادخل مواقع بعض القوائم مو حبا فيها و لكن الفراغ ذبحنا الا اشوف بيان شكل و اليوم اللي بعده بيان ثاني قلت اووله شدعوه ليش منو هم عشان يسوون كل هذا , و اللي قاهرني اكثر انهم يتفاخرون بالبيانات اقصد بيانات القوائم فيما بينهم , كل يوم واحد مبدع و منزل بيان شكل , ما ضحكني الا بيان تفوق , مادري شالسالفه , وزارة التعليم العالي و التربيه اللي هي اعلى من الكل ما نزلت بيان تفوق ؟؟
انا بس اللي دايم اردده و اقوله انه اللي بين القوائم حرب و ما هي خدمه طلابيه و اكبر دليل انه كل وحده تتصيد على الثانيه اتفه الامور و تاركين الاعمال اللي عاملينها , و على طاري البيانات وحده تضحك عالثانيه ليش ما نزلوا بيان و احنا نزلناه , و الا بعد مره من المرات صاروا دقيقين الا ابعد الحدود يشوفون من نزل قبل الثاني و يتفاخرون احنا نزلناه الليله الي طافت و انتوا نزلتوه الصبح فاحنا احسن , تحس شغل يهال.
و نقطه ثانيه مهمه اعتقد ذكرتها فوق بالبدايه الا و هي انه بالطريقه اللي قاعد يسوونها ببيانتهم دليل قاطع لمخالفتهم النهج اللي ماشين عليه , ما تذكرون دوم يطالبون باصلاح حكوماتنا بالتوقف عن اسلوب بيانات الاستنكار و الشجب اللي ما تقدم و لا تأخر و لكنهم بطريقتهم يطبعون و يعودون الاجيال و الطلبه بهذه الطريقه على البيانات اللي ما تقدم و لا تأخر كما يقولون و لكن الحرب اللي بينهم نستهم كل مبادئهم .
ختاما مادري شنو المشكله اذا ما نزل بيان من البيانات و شنو الهدف من البيان هل هو تذكير و الا شنو , اذا كان رسالة تذكير انا افضل انه ينزل كمسابقه او فيديو عشان ما يكون بطابعه التقليدي المرفوض.
ترى اسبوعين و يرجعون الطلبه للدراسه , اتمنا ينزل بيان بمناسبة ردتهم و نسميه "بيان العوده" او "بيان الرده" عشان نكون وطنيين اكثر لانهم يموتون على اظهار و ابراز وطنيتهم .
و الله المستعان
محمد الراشد
اغسطس 2007
ملاحظه : نتمنى ما حد يزعل لانه ابداء الرأي مكفول بالدستور اذا ما كان فيه تجريح بشخص بأسمه
كفيف
في احد الايام و انا جالس بستاربكس اقرأ كتابا و كان الجو ممطر بالخارج مطر قوي , كان بجانبي شخص جالس و عليه علامات الحيره , و بعد فتره توقف المطر و كان الشخص اللي بجانبي بكامل اناقته قد تجاوز الأربعين من العمر لا يفعل شيئا عدا تحريك رجله . و فجأه التفت نحوي و سألني هل انا انتظر توقف المطر لأخرج من المقهى , فاجبته بلا بل اني اقرأ الكتاب , هنا استوعبت انه " كفيف " لانه لم يرى الكتاب الذي بيدي ,وكان دائم النظر للأعلى و بعدها بادرني بسؤال أخر الا و هو " هل توقف المطر " فاجبته بالايجاب و انه توقف من فتره طويله . بعد اخباره بتوقف المطر , تغير محياه و ارتسمت بسمه عريضه على وجهه و قام و اخرج عصاه لتقود طريقه , مشى متوجها الى باب المقهى و اخرج جهاز غريب و قام بالاستماع اليه , كان الفضول يقتلني لأقوم و اعرف ما هذا الجهاز , بعد دقائق فتح الباب و خرج و بدا تحسس الجو بيديه و بعدها قام بالسير بسرعه على جانب الطريق و كأنه مبصر و ليس بكفيف , فيا سبحان الله كيف يعيش المكفوفين بهذا البلد و من دون اي مساعده من أي شخص , فيوميا ترى مجموعه منهم يتجولون بالشوارع و يعبرون الاشارات المروريه من دون اي قلق و يقرأون و لا يشعرون بالنقص كونهم لا يبصرون , فسبحان الله حيث ان الكفيف هو كفيف البصيرة و ليس كفيف البصر.
على النقيض من هذا نرى الكثير من المكفوفين ببلادنا يصادقون منازلهم و لا يعيشون حياة طبيعيه بل غالبيتهم تراهم لا يفارقون منازلهم الا للصلاة بالمسجد او لأداء عمل بسيط للحاجة القصوى . حيث اشعر بما يشعرون به انهم منبوذين من الشعب و كأنهم عاله على المجتمع و لسبحان الله اننا ننسى او نتناسى انهم هم البركه و الخير الذي ينقذنا من الكرب بدعواتهم , و نتناسى ايضا انهم اقرب من الرحمن منا فلماذا نتناسى كل افضالهم و لا نذكر سوى انهم منبوذين.
متى يكون مكفوفينا لهم قيمه و يعيشون كما يعيش مكفوفي البلدان الاخرى المتقدمه و نحن تابعين خير الأديان .
الحمد لله رب العالمين و الله المستعان.
محمد الراشد
|
|